Acara-acara Bahagia ^^

Selamat pagi Ambooon !

Beta ada cerita terbaru tentang katorang orang Ambon yang tinggal di Jatinangor. Mau tau ka seng? Hahah

Katong masih sering bakumpul biking acara kecil-kecilan. Tapi kali ini katong pung acara paleng banya skali. Mulai dari makan-makan, karoke, nonton bioskop, sampe pi ka acara wisuda. Katong suka eksis sadiki-sadiki di tanah orang seng papa tooo? Hehehe

Acara pertama !

Ngopi bareng di ngopdul ...

Beta, Nana, Ka Ges, Abang Hari :)

Waktu itu hari Kamis, beta ada balajar par persiapan ujian Hari Senin, tiba-tiba abang Hari telp beta suruh beta datang ka kaka Ges pung kosan. Beta bilang sabantar sore jua baru beta ka kaka ges pung kosan, setelah selesai balajar. Pas su sore, beta OTW kaka Ges pung kosan, beta su lia kaka Ges deng Nana bajalang kaluar dari Gang kacil, dalam hati beta tanya dong mo pi mana ni? Beta panggel dari jao dorang su seng dengar lai gara-gara beta pung suara panggilan kalah dari suara kendaraan. Awalnya beta pikir, dorang dua pasti mo ka Griya bali sesuatu, beta bajalang iko dong lai, padahal su sampe depan Griya, dong bajalang trus ka arah Jatos. Beta rencana mo kaskaget dorang dua, beta bajalang sambunyi-sambunyi di dong pung blakang. Pas beta lari palang-palang ka arah dong, su dekat deng dong, tiba-tiba dorang dua kaget bukang maeng, beta balom par kaskaget dong lai, dong su batarea kaya ada orang pancuri bagitu, sampe-sampe tukang parkir yang ada disitu kaget lai, hahahaha rupanya berhasil, dong dua bilang dong pung jantong kaya mo talapas. Hahaha

Pas pulang dari Jatos, Nana bilang katong iko abang Hari di ngopdul jua, akhirnya katong bajalang ka muka kampus arah ngopdul, su sampe bagini, ternyata beta ketemu Evan deng dia pung tamang-tamang orang Manado ada dudu di samping katong lai.

Carita-carita deng abang Hari bagini, Abang hari suruh katong pesan. Dong pung menu-menu asli lai, beta deng Nana pesan Cappucinno Punch, ka Ges pesan Es cingcau Cappucino. Abang Hari pung kopi su abis sebelum katong datang lai, jadi dia Cuma pesan Air mineral saja deng pisang keju. Seng lama lai abang Mat telp ka Ges, ka Ges bilang iko katong di ngopdul, akhirnya abang Mat datang langsung pesan Hot Chocolate.

:) (:

Sambil ngopi, katong carita tentang katong pung kampung tercinta, Hena Lima. Abang Mat kasih katong pung pengetahuan baru, tentang sejarah, struktur, dll... katong diskusi sampe jam 22.30, cukup lama lai, katong tutup diskusi dengan harapan bisa memberikan sesuatu untuk Hena Lima.

sesi diskusi :P

Acara Kedua !

Nana Ulang Taon ...

sooo sweeet :P

Ceritanya, beta baru pulang ujian lalu singgah di Ka Ges pung kosan. Lalu abang Hari ajak katong pi karoke di Jatos. Pulang karoke bagini, beta deng Ka Ges kepikiran par bali Nana pung sesuatu barang dia baru ulang taon beberapa hari yang lalu saja. Nana seng iko karoke deng katong barang dia iko rapat organisasi, jadi pas paskali, katong bisa biking surprise kecil-kecilan par dia do tooo? Heheh

Waktu jalan deng Nana beberapa hari yang lalu, beta ada lia Nana suka Galang satu la dia ingin bali akang, cuman seng jadi bali waktu itu, jadi beta bali akang par kasih dia hadiah itu tooo, pas skali deng dia suka akang. Kaka Ges bingung mo bali apa par Nana, beta lai bingung. Akhirnya, Ka Ges memutuskan par bali kue. Katong rencana mo kasih kaget dia deng bawa kue. Ka Ges masih pung sisa lilin waktu ka Ges ulang taon, jadi katong bisa pake par taro di Nana pung kue ulang taon, hahaha

Setelah katong su persiapkan kue, lilin, deng korek api, katong bajalang ka Nana pung Kosan. Beta yang toki pintu kamar deng bersalam. Ka Ges pegang kue baru badiri di balakang beta. Nana buka pintu, akhirnya katong kasih kaget dia, setelah itu Ka ges maso deng pegang kue, baru katong manyanyi Happy Birthday to You par Nana. Hahahhahaha

Acara ketiga !

Kaka Fira ulang taon ...

Nana ulang taon tu tanggal 31 Mei, kalo Ka Fira 10 Juni. Katong patungan par bali kue ulang taon par kaka Fira. Ka Fira jua seng tau kalo katong ada bali kue par dia. Ka Fira dong rencana mamasa di Kaka Mia pung kosan par dia pung ulang taon ini. Baru katong tar ada satu lae yang kasih ucapan selamat ulang taon par Ka Fira, karena katong su baku janji, nanti katong jadi orang terakhir yang kasih ucapan selamat pas katong pi bawa kue. Tapi Nana ni dia biking pelanggaran, balom apa-apa lai dia su kasih ucapan par Ka Fira lewat twitter. Adoehh ! (tepokjidat)

Acara mamasa-mamasa su selesai, tinggal makan-makan saja. Pas katong datang bawa kue, Ka Fira ada di Kaka Mia pung kamar nonton televisi. Karena Ka Mia pung kamar di lantai dua, akhirnya katong nae ka atas, Nana yang pegang kue. Seperti biasa, katong biking surprise kecil-kecilan.

Setelah acara makang-makang selesai, ternyata ada surprise besar-besaran dari Kaka Mia dong. Dong siram Kaka Fira deng aer kotor, tarigu, dll.. pokoknya paleng badaki paskali, tapi serrrrruuuuu hahah ! sayang beta balom ambel akang pung foto-foto dari Alia-ana Tulehu.

Acara keempat !

Memenuhi 2 undangan makan di Kedai Indra ...

(Hahah judul acaranya gaya bangeeet)

Akang pung carita bagini....

Nana pung Papa ni ada datang di Jatinangor, sebenarnya su beberapa hari di Nangor, pas antua mo pulang par akang pung besok ni, antua traktir katong ana-ana Hena Lima ni dolo. Ceritanya hari itu beta ada jadwal mengajar ana-ana papua dong, karena katong janjian kumpul di kedai indra jam 1-su lewat jam 1 beta masih di dalam kelas anak papua- akhirnya Nana telp, tapi karena beta pung Hp seng pake nada panggilan deng getar, tambah deng beta seng liat Hp, jadi sempurna sudah, akhirnya beta seng angkat panggilan jua, beta selesai mengajar saja jam stengah 2, akhirnya beta buru-buru ke kedai indra. Sampe sana bagini, ternyata bukan dong tunggu beta sandiri, tapi Kaka Fira lai, hahah. Sambil tunggu Kaka Fira, katong pesan makanang kamuka, karena ini Nana pung Papa yang traktir, jadi katong pilih makanang yang sadiki berkelas dolo, hahahaha

@kedai indra

Setelah itu, katong dapa undangan makan yang kedua di kedai indra. Kali ini abang Mat yang traktir. Sebenarnya ini undangan dadakan. Ceritanya hari itu samua ada bakumpul di beta pung kosan, Beta, Kaka Ges, Kaka Eka, Ika, deng Nana. Carita-carita deng makang. Pas su sore baru dong pulang, setelah dong pulang, seng lama lai Kaka Ges telp suruh kumpul di kedai indra, abang Mat undang makan-makan barang besok antua mo wisuda S2. Akhirnya makan gratis lageeee hahahaha

Acara kelima !

Memenuhi undangan wisuda di IPDN ...

Gaya banget lah anak-anak Hena Lima ini. Abang Mat kase undangan par Kaka Ges, suruh katong hadir. Kalo beta seng salah, yang tertulis di dalam undangan itu hanya untuk 2orang, tapi yang Hadir mewakili undangan itu Beta, Kaka Fira, Kaka Ges, Nana deng Ika. 5orang ! hahaha !

Skali lae, pokoknya gaya banget laaah kurcaci 5orang ini, su bagaya kaya mo pi pesta saja, baru katong pake acara bali bunga par Abang Mat lai, haha. Tambah deng Nana bali boneka Beruang yang pake toga tu par abang Mat. Haha kocak.

cantik-cantik to? haha

Tapi satu hal yang biking sedikit jantungan adalaaaah, katong su tunggu Abang Mat lama lai, su bacari pas Abang Mat dong su kaluar dari gedung mondar-mandir, eh, pas ketemu bagini, abang Mat su tar pake akang toga itu lae, su lapas akang, baru tinggal kameja yang seng rapih kaya orang yang seng wisuda saaa, padahal katong su bapake rapi-rapi laee, ceritanya katong pung abang ini wisuda S2 nyooong, eh ternyata orang yang wisuda S2 yang tar rapi, abang Mat biking katong detak jantung barenti selama 0,5detik hahahaha

Akhirnya katong paksa abang Mat par pake akang toga itu ulang supaya katong mo foto-foto deng antua. hahahaha

Acara terakhir !

Nobar Cahaya Dari Timur : Beta Maluku ...

Di Jatinangor ini orang Maluku lumayan banya, Islam maupun Kristen. Jadi pas ada film ini, samua bersatu, biking janji par booking bioskop. hahaha. Pokoknya katong nonton hari pertama pas dong tayang akang.

Akang pung film rameee, serrru, kocak, lucuuu, sediiih, hahaha. Akang pung cerita paleng bagus paskali. Biking katawa sampe ngakak, tapi sedih biking aer mata jato laeee. Yang merasa orang Maluku, nonton dooong, langsung ke bioskop terdekat di kota anda, sebagai dukungan untuk dibuatnya film-film dari timur. Hehehe

Nonton film di bioskop rame-rame deng anana Ambon ni serrru lae, suka batamba, bahura, hah pokoknya lucuuuu. Orang Ambon yang seng nonton tu bukan orang Ambon hahaha *peace :P

Selesailah cerita ini, karena skarang beta ada di Pare-Kampung Inggris, maka Nantikan cerita selanjutnya tentang Pare, insya Allah dalam bahasa Inggris. Babaaaayyyyy !