ISENG-ISENG

Tamang-tamang, hari ini beta mo carita sadiki tentang Ambon do. Tentang orang Ambon yang ada kuliah di Jatinangor ini. Katong ada barapa orang skali disini suka biking acara kecil-kecilan. Katong jaga bakumpul rame-rame par jaga mamasa makanang Ambon disini, supaya bisa kasih kurang katong pung rasa rindu deng kangen par Ambon too.

Beta, kaka Ges, kaka Fira, kaka Vika, ade Nhana, deng kaka Eka.

Pertama kali dong mamasa tu, dong biking papeda, makanang khas Ambon yang dong biking akang dari sagu manta, tapi waktu itu beta seng iko biking deng dong jadi beta jua seng tau akang pung acara bagimana lae.

Pas biking acara kedua, dong biking kasbi goreng deng sambal. Waktu itu kaka Ges telp beta par mo mamasa di beta pung kosan tapi beta ada rapat organisasi, jadi dong mamasa di kaka Rani pung kosan.

Pas su selesai rapat bagini, beta mo pi iko dong par mamasa sama-sama, mar beta pung tamang-tamang organisasi ajak beta par pi jenguk katong pung kaka tingkat yang ada masuk rumah sakit, la akhirnya katong pi bali sesuatu par bawa ka rumah sakit sekalian jenguk, katong bale dari rumah sakit pas selesai sombayang maghrib, lalu beta telpon kaka ges, karena su malam lai jadi beta pikir pasti dong su selesai mamasa, soo, beta telpon par tanya dong jang sampe dong masih bakumpul kaa.

Pas beta telpon, kaka Ges suruh kasana, akhirnya beta bali sesuatu par dong, beta tawar tempe mendoan, tapi kaka Ges kaya bingung-bingung kaaa, kayanya kaka Ges seng tau tempe mendoan itu yang mana deh, haha.

Akhirnya kaka Ges suruh kaka Fira yang bicara deng beta, baru kaka Fira pung suara basar, mulu crewet. Hahaha. Dong pesan martabak, kaya beta pung muka ni akang su kaya deng martabak bagitu. Hahaha. Beta datang bawa martabak pandan par dong, baru beta datang pas dong baru abis goreng kasbi su siap-siap mo makang ini, akhirnya beta iko makang deng dong. Kasbi panas-panas deng sambal padis paleng enak sajaaa. Baru sambal akang paleng sadap juaaa, biking beta tulis tulisan ini deng mulu baaer saja. Hahaha :D *kidding

Coba tebak acara ketiga tu katong biking apa coba? ES PISANG IJO !!!

Ini bukang Es Pisang Ijo yang dong jual disini bukang, disini akang pung porsi su kacil, baru dong pung pisang tu dong seng pake rabus akang lai, baru akang paleng mahal sajaa. Biking katong yang orang Ambon ini bali deng makang makang hati saja ee. 

Waktu katong ada makang kasbi goreng par acara yang kedua tu, katong su rencanakan acara yang ketiga ini, cuman waktu itu katong rencana mo biking papeda deng ikang kuah putih. Tapi pas su bakumpul bagini, dong bilang mo biking sayor ulang-ulang. karna su siang lai jadi, su jam 11 siang jadi kaka Ges bilang su lat, la beta bilang kalo bagitu katong biking gudangan sa jua, akang seng talalu ribet lai, katong bapikir paleng lama par mo putuskan katong jadi mamasa apa ini, akhirnya pilihan jatoh par ES PISANG ! mengingat ada tarigu yang dong su bali barapa hari yang lalu, pas biking acara kedua itu.

Akhirnya katong baku bage tugas par bali akang pung bahan-bahan to. Beta bali Gas, kaka Eka bali sirop, ade Nhana bali susu kaleng, kaka Fira deng kaka Ges pigi di pasar par bali pisang deng akang pung bahan-bahan yang laeng. Baru kaka Vika ini dia ada bacuci dia pung pakeang barapa parteng skali itu di asrama kampus. Dia seng pi bawa di aer batang skali jua. Hahaha :D

Pas katong ada mo pi bali akang pung bahan-bahan bagini, katong pung sodara satu yang ada ambe S2 di IPDN datang. Katong panggel dia abang Mat. Akhirnya kaka Fira deng kaka Ges kaluar par pi pasar kamuka. Beta, Nhana, deng kaka Eka katong carita-carita deng abang Mat, batukel sadiki dolo tooo, jang sampe antua bilang baru datang saja katong su pi kaluar kastinggal antua sandiri.

Bacarita lama sadiki, akhirnya katong tiga orang kaluar pi bali Gas, Sirop, deng Susu kaleng di Griya, baru katong suruh abang Mat jaga kos. Hahaha 

Pas katong su bale dari Griya, katong tunggu kaka dua orang itu dong pulang balanja dari pasar too, baru dong pigi paleng lama annnaaeeee... pas dong su datang bagini baru dong carita kanapa sampe lama bagitu, ternyata terjadi konflik kacil yang tak berujung. Hahaha

Setelah katong rabus pisang, biking fla, deng laeng-laeng tooo, akhirnya ES PISANG IJO tu akang jadi.
TARRAAAA !!!

Baru katong biking paleng banya, tamba deng abang Mat antua seng mau makang gara-gara lagi flu, akhirnya katong pi kase par kaka Ges pung tamang kos.

Menu berikutnya nanti katong mo biking apa lai ini, nantikan di cerita selanjutnya saja eee :D :D :D